गजल -४७ नभएको देखाएर, भा’को कुरा लुकाउने ; बन्यो संस्कृती हाम्रो ,बाहीरी दाँत देखाउने। (१) छाड्दै जाँदा परम्परा,संस्कार र संस्कृति; कसरी हो नेपालीले, मौलिकता टिकाउने । (२) राम्रोसंग बुझ्न खोजौ, गाँठी कुरा सभ्यताको; नबुझेरै किन ब्यर्थै , सारा बिश्व हँसाउने । (३) खुराक र पोशाकले, कहाँ बन्छ सभ्य मान्छे; यि हुन युक्ती ब्यापारीले, ग्राहकहरु फसाउँने । (४) शिष्ट बोली अरुसंग नम्र बनी पेश हुनु ; आधार हो दुनियामा सभ्य भनी चिनाउने । (५) मान गर्दा अरुलाई, उर्जा बढ्छ जिन्दगीमा ; यस्तो असल यस्तो सरल,मौका किन गुमाउने । रचना : यज्ञ प्रसाद गिरी आनन्दबस्ती, ललितपुर