गजल १०७
यो दशैमा जसरी’नि, आउनु पर्छ बाबा ;
अरुले झै घोर्ले खसी, ल्याउनु पर्छ बाबा ।
(१)
पोहर साल दसैमा’नि, थोत्रै लुगा लाएँ ;
यो दसैमा नयाँ लुगा, लाउनु पर्छ बाबा ।
(२)
चाड-पर्व आयो कि त, आमा खिन्न हुने;
अरु जस्तै उनले हाँस्न, पाउनु पर्छ बाबा ।
(३)
ठगी पेशा गर्नेहरु, धनि बन्दै गा’छन;
किन होला थाहा हाम्ले, पाउनु पर्छ बाबा ।
(४)
समाजमा खुसी बाड्छौ, भनि हिड्नेहरु ;
ठग बनें यिन्लाई तह, लाउनु पर्छ बाबा ।
(५)
नेतालाई देख्यो कि त, ठोकी दिउ झै लाग्छ;
यिन्को बाजा बज्ने दिन, आउनु पर्छ बाबा ।
रचना: यज्ञ प्रसाद गिरी
आनन्दबस्ती, ललितपुर
No comments:
Post a Comment