Monday, July 24, 2017
गजल
अवसरबादीको लर्को छ, शक्तिको वरीपरी ;
यो समस्या चर्को छ , शक्तिको वरीपरी ।
(१)
साख्कै हुन पुगेका छन , बाटो काटी हिड्नेहरु ;
कहानी घर-घर्को छ , शक्तिको वरीपरी ।
(२)
मरी-मरी खटेकाथ्ये , गाँउका सिधा-साधा ;
घेराबन्दी शहर्को छ, शक्तिको वरीपरी ।
(३)
मात अनौठो हुदो रै’छ शक्तिको‘नि हजुर;
विवेक निम्न स्तर्को छ , शक्तिको वरीपरी ।
(४)
हाउ-भाउ बिचित्र छ,हिजो सबै बिर्से जस्तो;
सिमा धर्म न डर्को छ, शक्तिको वरीपरी ।
रचना: यज्ञ प्रसाद गिरी
अनन्दबस्ती ललितपुर
श्रावन १० गते, २०७४ साल
Sunday, July 23, 2017
गजल
थाहा छैन, साथी को बन्छ, जिन्दगीमा;
कहिले कस्ले, मन छुन्छ ,जिन्दगीमा ।
(१)
चाहेझै सुखद कहाँ हुन्छ र ? सफर ;
निमेषमै बन्छ, बिग्रन्छ , जिन्दगीमा ।
(२)
हिसाब-किताब, मायामा'नि लागु भए;
घाटै-घाटाको बज्र, बज्रन्छ जिन्दगीमा ।
(३)
नेताको नाराको, पारामा लाग्यौ भने ;
थाहा छैन के-कस्तो, हुन्छ जिन्दगीमा ।
(४)
त्रसित हुनु किन , भविष्यको त्रासले सधै ;
चाल्दै जाऊ कदम, स्वच्छन्द जिन्दगीमा ।
यज्ञ प्रसाद गिरी
आनन्दबस्ती, ललितपुर
२०७१ साल, कार्तिक १८ गते
Thursday, July 13, 2017
छाती तानी हिड्ने चोर, के भा’को हाम्रो समाज ;
उल्टै तिनको ठुलो स्वर, के भा’को हाम्रो समाज ;
(१)
ब्यापारी र शिक्षक अनि बुध्दिजिवी भन्नेहरु;
उस्कै अघि लम्पसार, के भा;को हाम्रो समाज ।
(२)
सोझालाई दोषी देख्ने , न्यायका ठेकेदारहरु ;
न्यायको यो कस्तो धार, के भा’को हाम्रो समाज ।
(३)
खोला-नाला सिमाना’नि, बेची दिने हाकाहाकी ;
संरक्षक बन्छ लाचार , के भा’को हाम्रो समाज।
(४)
खुरापाती मात्र यहाँ , मौलाएका चारैतिर ।
अनैतिकताकै ब्यापार, के भा’को हाम्रो समाज।
रचना: यज्ञ प्रसाद गिरी
आनन्दबसती , ईमाडोल -९
ललितपुर, साउन ३१ गते, २०७२ साल
Wednesday, July 5, 2017
गजल११५
कोही रुपको कोही शानको, बिज्ञापन गर्छन;
शरिरको, कोही मुस्कानको, मापन गर्छन ;
(१)
जवानी सबैको आउछ जीवनमा, एकै पटक;
मालीकै अगाडी उद्धानको ,बखान गर्छन ।
(२)
प्राकृतिक छ फैलिन्छ, महक आकर्षणको;
सल्किन्छन् भुसझै कोही र कोही, दन-दन गर्छन।
(३)
जे-जे माने’नी भोगिन्छ जिवन त, एकै पटक ;
हाँसेर जिउने कोही र कोही, गनगन गर्छन।
(४)
सुवास त सुवास हो मिठो लाग्छ, सबैलाई;
कोही मातले मातेर भमराझै, भनभन गर्छन ।
(५)
भनिन्छ युद्ध र प्रेममा नाजायज, हुदैन केहि ;
भन्दै कोही हतारमा जिन्दगी, अर्पन गर्छन ।
रचना: यज्ञ प्रसाद गिरी
आनन्दबस्ती, ललितपुर
<गजल
छुट्टिएर तिमीसंग, बाँच्नै गाह्रो भा'छ ;
सुस्त-सुस्त दुखाईको, मात प्यारो भा'छ ;
(१)
भनुँ भने के भनुँ खै, भन्न चाँहदैन ;
आज तिम्रो उपेक्षाले, मन अध्याँरो भा'छ ।
(२)
फूल जस्तो रुप थियो, नौनी जस्तो मन ;
ढुग्ङा जस्तो किन होला, सारै साह्रो भा'छ ।
(३)
हराएछु जिन्दगीको , सुनामीमा परी;
हिजो भन्दा आज खुसी, झन उधारो भा'छ ।
(४)
कहाँ लगी घोप्ट्याउनु, ब्यथित मन मेरो ;
गजल मेरो पीर पोख्ने, ढुग्ङे धारो भा'छ ।
यज्ञ प्रसाद गिरी
आनन्दबस्ती, ललितपुर
२०७१ साल श्रावण, २७ गते
Subscribe to:
Posts (Atom)