गजल ८३ तिमी मेरो सम्झनामा, आयौ सुस्त-सुस्त ; सुगन्धझै ह्रदयमा, छायौ सुस्त-सुस्त । हर्ष हो कि पिडा हो यो, या हो अन्य केही; मात बनी मस्तिष्कमा, छायौ सुस्त-सुस्त । असर कस्तो पर्यो कुन्नी तिम्रो चाहनाको ; कुटु-कुटु गर्दै मुटु, खायौ सुस्त-सुस्त । लक्ष तिम्रो के हो कुन्नी थाहा छैन केही ; ह्रदयमै बिझ्ने गीत, गायौ सुस्त-सुस्त । तिम्रो कब्जा बढ्दै गा'छ, सोचाईमा पनि ; मिठो बिष गिन्दगीमा, लायौ सुस्त-सुस्त । मेरो आफ्नै हक पनि , लाग्छ हराउदैछु ; मेरो निजी अधिकार, पायौ सुस्त-सुस्त । रचना: यज्ञ प्रसाद गिरी आनन्दबस्ती, ललितपुर