गजल-२६

मेरो जस्तै तिम्रो पनि बिचित्रको रहर छ कि?

गाई बस्तुको बथानमा, नदाएको बहर छ कि ?

(१)

कस्ले रोक्ने कस्ले छेक्ने , सिमा कस्ले तोकि दिने ?

तिम्रो रात्मा मेरो जस्तै, जागा बस्ने प्रहर छ कि ?

(२)

दौडी राख्ने मन बनी, घोडा बिना लगामको  ;

अतितको सागरलाई जोडी राख्ने नहर छ कि ?

(३)

कुर्दा-कुर्दै जिन्दगीले , नेटो काटी सक्दा पनि ;

किनारालाई छुन खोज्ने , आशाबादी लहर छ कि ?

(४)

नबिर्सने , नमेटिने  न खुसी हो  न बेदना ;

भित्र-भित्रै असर गर्ने मन्द-मन्द जहर छ कि ?

(५)

परम्परा ,मान्यता र कोशौ टाढा दुनियाको ;

कल्पनाले सिगारेको त्यो तिलस्मी शहर छ कि ?

रचना: यज्ञ प्रसाद गिरी

आनन्दबस्ती, ललितपुर