गजल-२७

आउ मित्र नजिक मेरो, अन्तर्मनका कुरा गरौ ;

दुख-सुखका कुरा गर्ने, चाहनालाई पुरा गरौ ।

(१)

सधै सुन्छु सधै देख्छु , आडम्बरी कुराहरु;

देखावटी कुरा हैन, मन खोलेर कुरा गरौ।

(२)

नमिसाई जतन गर्दै , पेशालाई मित्रतामा ;

सम्झनामा बाँची राख्ने, अतितका कुरा गरौ।

(३)

कार, महल, प्रतिष्ठा र सफलताका कथाहरु ;

संग्रहका कुरा छोडौ , मित्रताका कुरा गरौ ।

(४)

तिम्रो हाँसो,बोली पनि , बनावटी भै सकेछ ;

नलुकाई नदेखाई , खाँटी भित्री कुरा गरौ ।

(५)

जसरी पहिले हामी, प्रकृतिमा रमाउथ्यौ ;

भिर- पाखा हरियाली घाम-जुनको कुरा गरौ ।

रचना: यज्ञ प्रसाद गिरी

आनन्दबस्ती, ललितपुर