गजल ८०

मलाई जस्तै तिम्लाई’नि, बाँच्नु  खल्लो ला’को छ कि ?

तिम्रोतिर  टोलाई राख्ने , नौलो रोग आ’को छ कि ?

(१)

मेला –उत्सव चाड-पर्व , लाग्न छोड्यो रमाईलो ;

तिम्रो पनी मेरो जस्तै,मन उडी रा’को छ कि ?

(२)

केही कुरा हराएझैं, मनको भित्री ढुकुटीको ;

नभेटिने आशंकाले मनै खिन्न भा’को छ कि ?

(३)

किन- किन कता-कता, खाली-खाली भए जस्तो;

बिचित्रको मुटुभित्र, रोग बढ्दै गा’को छ  कि।

(४)

उराठ-उराठ बनी जिवन, मनको शान्ति हराउँदा ;

मलाई जस्तो अनुभुति , तिम्लाई पनि भा’को छ कि ?

(५)

जिन्दगीको गोरेटोमा, बढ्दै जाँने सिलसिलामा ;

कुनै बिन्दु समातेर, बसौं जस्तो ला’को छ की ?

रचना: यज्ञ प्रसाद गिरी

आनन्दबस्ती, ललितपुर