गजल १३६
मेरो चोखो माया पनि, सस्तो लाग्यो तिमीलाई;
बर्षातको सस्तो पानी, जस्तो लाग्यो तिमिलाई ।
(१)
कि परेर कि पढेर , बुझिन्छ रे जिन्दगानी ;
नाफा धाटा खोज्दै हिड्नु, कस्तो लाग्यो तिमिलाई?
(२)
साट्न खोज्यौ नसाटिंदा, सुन,हिरा मोतिसंग ;
समर्पणको प्रमाण त , खोस्टो लाग्यो तिमीलाई ।
(३)
पैसालाई अँगालेर, चोखो प्रित बिर्सी दियौ ;
सुन्को मुटु पायौ अरे, कस्तो लाग्यो तिमीलाई ?
(४)
मायालाई जाँच्ने कसी, बिलाशिता बने पछी ;
मुल्य मेरो चाहनाको , खस्दो लाग्यो तिमीलाई ।
(५)
मौका छोपी चल्नेलाई, दुनियाको चासो किन ;
नाटकको एउटा दृष्य , जस्तो लाग्यो तिमीलाई।
रचना : यज्ञ प्रसाद गिरि
आनन्दबस्ती, ललितपुर
