गजल उन्लाई भेटेको दिन महान हुन्थ्यो ; रातभर सपना देखेर , बिहान हुन्थ्यो । (१) आतुर हुने मन, मिलनको पर्खाईमा ; घडीको सुईनै, अडेको भान हुन्थ्यो । (२) हेर्दैमा बेलगाम , धड्किन्थो यो दिल ; दैलोमा स्वस्तिकको, निशान हुन्थ्यो । (३) मन कतै, किताब आँखा अगाडी हुने; ह्रदयमा मात्र तिम्रो, बखान हुन्थ्यो । (४) गल्ति गरेझैं लाग्थ्यो, मनमा कहिले ; गल्ति फेरी-फेरी र जानाजान हुन्थ्यो । (५) भोगेको छु एक टुक्रा स्वर्ग मैले पनि ; अन्यथा यो जिन्दगी चिहान हुन्थ्यो । यज्ञ प्रसाद गिरी आनन्दबस्ती, ललितपुर २०७१ साल श्रावण, २८ गते